ــــــــــــــــــــــــــــــــــــ
يامصر ببانك فين
احنا كنا عارفين
لما قال المولي عنك
ادخلوها آمنين
بس دلوقتي احنا تايهين !!
وسط موجه ورا موجه
بقينا مش عارفين
اتجاه قبلتك يروحولوا منين
وسط أمواج الضلال
اللي حل عليكي مبين
وسط الزيف اللي كسا
وشوش المؤمنين
مين يصدق مين ؟!!
الحق فيكي بقي متغلف
كل واحد عمال يألف
ويلم عليه الأفاقين
من اللي بياكل علي
كل الموائد
كل المبخراتية
واللي ماشي في فلك المشعوذين
كل اللي ماسك في ايده مبخرة
عامل شيخ أمين
الفتوي ما بقيتش فتوي !!
بقت تمثال عجوه
ياكلها الجعانين
حاجة بتاعة وقتها
حاجة تشكي لربها
ظلم العباد المفتونين
بجاه السلطة
بجاه العز
علي دم المصريين
سوس بينخور
في قلبك يابلدي
سوس بياكل بعضيه
شلة وقالوا نفضها
القلب مال لبعضها
لكن طلعوا كدابين
لما عملوا البحر طحينه
ركبنا كلنا السفينة
وقلنا نتوكل علي ربها
اللي تحت خرموها
اللي فوق ضيعوها
بدأت مياه البحر تملاها
لا حد عايز يتحرك
أو يشيل همها
أما الأخ يقتل أخوه !!
الابن يدبح أبوه
فيه ايه تاني بعدها
لما الحق ينداس بالرجل
لما الصوت يتخنق يهج
لما تحارب قلعة علم
وتحطم جدران الثقة
عاوز ايه من أم مكلومة
أب يفقد في لحظة ولاده
لما تغذي نار الفتنة
بناس فقدت العزة
في وحل الجريمة
من يومها متمرمطة
وحياتها ملهاش قيمة
غرقت والكل بيجري
يدور علي شط نجاة
الفالح هو اللي يدري
فين هو الاتجاه
رقاصة بتفتي
ديوث بيفتي
وشيوخنا غايبين
فتنة وصابتنا
مين يلحقنا مين
كلنا تايهين
أو قول ضالين !!!
ــــــــــــــــــــــــــــــــــــــــــــــــــــــــ
بقلمي / محمود مسعود ( عامي ) 9/3/2016م
ليست هناك تعليقات:
إرسال تعليق